- صباح اليوم بدأت روسيا عملية عسكرية واسعة، شملت اجتياح بري من أكثر من جبهة مع أوكرانيا.
- اجتياح للقوات الروسية من جبهة شبه جزيرة القرم، ومن الجبهة الشرقية مع المناطق الانفصالية في أوكرانيا دونيتسك ولوغانسك، وقصف مدفعي من الشمال من الجارة بيلاروسيا حليفة روسيا.
- العالم كان منتظر في الأسابيع اللي فاتت الاجتياح وخاصة بعد اعتراف بوتين باستقلال منطقتين انفصاليتين في شرق أوكرانيا، واللي فيهم إضطرابات جزء كبير منها سببه دعم روسيا العسكري للانفصاليين في المنطقتين.
ايه اللي حصل؟ ممكن نشوف الحدث ده ازاي في اللحظة الحالية؟
إيه اللي حصل؟
- مع بدايات الصباح بدأ قصف من عدة جبهات على أهداف عسكرية للجيش الأوكراني، القصف شمل مخازن عسكرية وقوات أوكرانية على خطوط التماس الفاصلة بين الجيش والانفصاليين.
- بعدها بدء اجتياح بري روسي عن طريق دبابات بتتوغل في عمق المناطق الشرقية، بعد إعلان بوتين لخطاب الحرب واللي اعتبره بمثابة تلبية لدعوة من جمهورية لوغانسك الشعبية اللي محدش معترف بيها غيره لإنقاذها.
-بدأ الاجتياح الروسي في ظل مقاومة من القوات الأوكرانية واللي تلقت دعم كبير في الشهور اللي فاتت على هيئة سلاح من الناتو وأوروبا، لكن الناتو حتى الآن معندوش قوات في أوكرانيا، ويمكن لا يفضل مواجهة عسكرية مباشرة مع الروس.
- الناتو نشر قوات عسكرية في الأسابيع اللي فاتت في القطاع الشرقي اللي بيشمل دول البلطيق ودول زي التشيك، وألبانيا، وبلغاريا، وكرواتيا.
- لكن في شكوك عميقة أنه قوات الناتو في القطاع الشرقي سوف تتدخل بشكل مباشر عن طريق نشر قوات عسكرية في أوكرانيا، ربما ممكن تقدم الدعم اللوجستي وخاصة في الدفاع عن الأجواء الأوكرانية من القصف الروسي بالطيران.
- كل دي تكهنات وفيه انتقادات متصاعدة موجهة للناتو والغرب بإنهم تركوا أوكرانيا بدون دعم أو غطاء كافي قدام الروس.
- لحد دلوقتي محدش عارف بوتين هيلتزم بأنه يدخل للمناطق الانفصالية ولا هيكمل ويحتل العاصمة كييف وبقية المدن الأوكرانية.
- الإدانات الدولية بدأت مع أول ساعات الحرب من كل الدول الأعضاء في الناتو والاتحاد الأوروبي ومن الولايات المتحدة وحلفاؤها اللي هيبدأوا في فرض عقوبات اقتصادية جديدة على روسيا.
- الوضع على الأرض سيء بالنسبة للمدنيين اللي شوفنا إزاي الروس بيستخدموا العنف المفرط تجاهم في حالات كثيرة يمكن آخرها سوريا.
إيه أصول الصراع ده؟
- في 2013 وبعد ثورة في أوكرانيا ضد الرئيس السابق المدعوم من روسيا فيكتور يانكوفيتش وهروب الراجل لروسيا خسرت روسيا أوكرانيا كحليفة تاريخية ضد الغرب من قبل حتى الاتحاد السوفيتي.
- الخسارة كانت كبيرة لروسيا وخاصة مع طموحات أوكرانيا في الانضمام للاتحاد الأوروبي، غالبية المواطنين الأوكرانيين شافوا المميزات اللي جت لبلاد قريبة منهم من الانضمام للاتحاد الأوروبي.
- بالتالي بدأت روسيا تتحرك لتقويض تغير بوصلة أوكرانيا نحو الغرب.
- الاضطرابات أو الصراع العسكري الموجود في شرق أوكرانيا بدأ بعد احتلال روسيا لشبه جزيرة القرم في 2014، واللي كان فيها انفصاليين مدعومين من روسيا.
- الرواية الروسية عن الأحداث والتدخل العسكري الحالي هي أنه المناطق دي فيها مواطنين من أصول روسية "بيتعرضوا للتنمر والإبادة الجماعية" من قبل ما يسميهم بوتين دائما واللي سماهم في خطاب إعلان الحرب "بالنازية الجديدة".
- بوتين بيستند لهذا الخطاب لأنه بيحمل إرث داخلي مهم بالنسبة لروسيا والاتحاد السوفيتي اللي سرديتهم الوطنية الأكبر كانت هزيمتهم للنازية وهتلر في الحرب العالمية الثانية.
- الصراع بدأ يشتد في الشهور الأخيرة مع كلام أوكرانيا عن الدخول لحلف الناتو، وهو الشيء اللي شافه بوتين تهديد مباشر لروسيا، وبالتالي صعد من خطابه، وبدأ الحشد العسكري لعشرات آلاف الجنود الروس على الحدود مع أوكرانيا من أسابيع.
- الحشد العسكري كان مسار انتقادات كبيرة، من قبل الولايات المتحدة اللي فرضت عقوبات اقتصادية إمبارح بعد الاعتراف الروسي بدونتسك ولوغانسك. ولكنه أيضا كان مسار انتقادات من الناتو بشكل مباشر والأهم من الاتحاد الأوروبي اللي هو على خط التماس الحقيقي في الصراع.
- الصراع مش بس صراع عسكري حول انفصال الإقليمين دول، ولكنه صراع بين روسيا والغرب بمعنى كامل وتهديد حقيقي للأمن الدولي وفي المقدمة منه المنظومة الأمنية الأوروبية.
- الصراع كمان يمكن اعتباره صراع اقتصادي بسبب تحكم روسيا فيما يقرب من 40% من إمدادات الغاز لأوروبا واللي بوتين استخدمه بشكل مكثف في الشهور الأخيرة لوضع أوروبا في أزمة طاقة مع بداية فصل الشتاء.
- أفضلية الغاز كانت عامل حاسم وخلت دول زي فرنسا تسعى للوساطة لحل الصراع بما يضمن بقاء الإمدادات الروسية من الغاز، وخاصة مع عدم وضوح البديل أو أنه فعليا مفيش بديل يعني سوي من قطر اللي مرتبطة بعقود مستقبلية كبيرة وعلى حد تقديرها متقدرش توفر أكثر من 15% من احتياجات أوروبا من الغاز.
- روسيا لديها دوافع سياسية واستراتيجية لكل اللي بتعمله في السنوات الأخيرة، بداية من التدخل في سوريا وتحدي الولايات المتحدة على أكثر من جبهة زي ما حصل في شبه جزيرة القرم ومحاولة تقوية الاتحاد الروسي ودعم الجمهوريات الصغيرة التابعة للروس في وسط آسيا.
- كل ده منطلق من مبدأ بيحكم السياسة الروسية الخارجية منذ صعود بوتين وله تنظيراته السياسية في الجغرافيا السياسية للدول وخاصة على إيد واحد زي ألكسندر دوجين وهو فيلسوف ومنظر سياسي مهم لروسيا ولليمين المتطرف في العالم كله.
- بوتين بيتحرك من نظرية دوجين عن المجال الحيوي للأمن القومي الروسي واللي فيه دوجين بيشوف أنه في عالمين أو قطبين بقيم مختلفة، في الشرق اللي روسيا من المفترض أنها تكون القائد بتاعه زي أيام الاتحاد السوفيتي وفي الغرب اللي الولايات المتحدة هي القائد بتاعه.
- بالتالي اللحظة دي ممكن نشوفها أكبر تصعيد من نهاية الحرب الباردة بين الإثنين، ولكن المشكلة الحقيقية هو تغير الظرف السياسي للعالم حاليا وأنه العولمة أنتجت بالفعل منظومات قيمية عابرة للدول نفسها ومبقاش في غرب وشرق بالمعنى التقليدي. وبالتالي ما يفعله بوتين هي مغامرات يجب أن تتوقف لأنها بالفعل بتهدد السلم الدولي والاقتصاد العالمي.
- روسيا منتج كبير للبترول والغاز والقمح وهما أهم تلات سلع في العالم دلوقتي ومهم جدا الحفاظ على استقرار أسعارهم عشان نوقف التضخم العالمي ويحصل تعافي للاقتصاد العالمي من آثار كورونا.
وماذا بعد؟
- اللي بيحصل دلوقتي من قبل روسيا تهديد للأمن والسلم الدولي، واعتداء على دولة ذات سيادة زي أوكرانيا، واستغلال لصراع داخلي كالعادة بين الأوكرانيين لفرض رؤية وهيمنة بالقوة.
- مينفعش كل دولة عندها طموحات توسعية أو نظريات عن أمنها القومي بتشمل تأمين مجالها الحيوي تعمل كده، لأن بالشكل دا العالم هيدخل كله في حروب مع بعضه لإنفاذ نظريات الأمن القومي.
- الحرب خطيرة وشيء مفجع ومحدش عاقل مفروض يشوفها حاجة كويسة، خاصة لما يكون فيها قوة نووية وهي روسيا وعلى خط التماس مع الناتو، ده لا يعني أنه هيبقى في حرب نووية لأنه السلاح النووي حاليا في الحروب هو سلاح ردع مفيش حد مجنون هيستخدمه، لكن الحروب الكبرى بين الدول بتفتح الباب على مآسي كبيرة للسكان المحليين وللعالم كله.
- مينفعش كمان أمريكا والغرب ينفخوا في نيران الحرب ويفضلوا يلعبوا لعبة "القط والفأر" مع روسيا لمصالح أمنية واستراتيجية، ويتركوا شعب أوكرانيا هو اللي يعاني ويلات الحرب في النهاية.
- نتمنى روسيا تتراجع، ويكون العالم بيحل خلافاته بالاتفاق والدبلوماسية مش بالحروب، لأن الحروب هي أسوأ ما أنتجته البشرية.
- نتمنى أوروبا اللي هي في موقف لا تحسد عليه تتحرك هي كمان في اتجاه طاولة المفاوضات، ويتم وقف المآساة دي مبكراً قبل ما الضحايا يكونوا بالآلاف.
- المبادئ اللي تأسس عليها النظام الدولي الحديث بعد الحرب العالمية الثانية زي مبادئ القانون الدولي واستقلال الدول هي مبادئ إحنا مؤمنين بيها حتى وإن كنا شايفين أنها تعطلت أكثر من مرة وتم انتهاكها من قبل قوى كبيرة في العالم زي الأمريكان وغيرهم.
- لكن المبادئ دي هي الضمانة الوحيدة أننا نعيش في عالم مستقر بلا حروب ولا صراعات مسلحة بيتنج عنها كثير من المآسي.
- نتمنى لكل المدنيين السلامة من الحرب اللي لا ليهم فيها ناقة ولا جمل.
نقلا عن صفحة الموقف المصري على فيسبوك
ليست هناك تعليقات:
إرسال تعليق